من فوائد الرخامة

واحد قريبي ملتزم , والدته بتقوله تتجوز هبة ولا فلانة؟
قالها لاء فلانة.
قالتله يابني خد هبة, هبة كويسة.
قالها لاء مش عايز هبة هاخد فلانة وخلاص.
قالتله يا ابنى خد هبة دي هبة كذا وكذا وكذا و.....
قالها: وانا أعمل ايه بكذا وكذا وكذا اذا كانت رخمة.

ماما ربنا يكرمها هي الى وصلتلي الحوار ده عشان تحرق دمي يمكن ربنا يهديني وأغير أستراتيجيتي في التعامل مع الأقارب, بس سبحان الله اول ما سمعته منها قعدت اضحك.

اوعوا تفتكروا انتو كمان ان انا كنت بضحك من فرط الرخامة

هو بيقول عليا رخمة عشان مش بهزر معاه ومش بكتر في الكلام زي فلانة اياها
بس ازاي يفهم وقاري أمام الاجانب على انه رخامة, المفروض انه ملتزم و فاهم ان دي مش رخامة دى محاولة لعدم الخضوع بالقول, مش هو بردوا حافظ القرآن ومرت عليه الآية دي
( يَا نِسَاء النَّبِيِّ لَسْتُنَّ كَأَحَدٍ مِّنَ النِّسَاء إِنِ اتَّقَيْتُنَّ فَلا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلا مَّعْرُوفً) من سورة الاحزاب

لو كان ملتزم حقيقي كان هيفهم سبب رخامتي في معاملته قصدي وقاري وهدوئي
كان هيدرك ان ده تنفيذ لكلام الله , مش لاسمح الله رخامة

انا كنت بقول ان الشاب ده كويس اوي ما شاء الله اخلاقه عالية ومتدين بس اوحش حاجة فيه ان لما فلانة اياها بتهزرمعاه بيجاريها وبيتمادي فى الكلام معاها, بس كنت بحاول اكدب نفسي واقول لاء ده كويس انا الى فاهمة غلط

بس سبحان الله تنفيذي لكلام الله فى موضوع (عدم الخضوع بالقول)هو الى كشفه على حقيقته -والله أعلم- وهو الى كفاني شر مرضي القلوب.

صدقت يارب لما قلت (الطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ) سورة النور

ومن هذا المنطلق ادعوا جميع الاخوات الفاضلات الى الـ.... وقار والهدوء امام الاجانب من الرجال حتى وان كانوا ذوي قربى

بس أنا بأخلي مسؤليتي من دلوقتي لو ان نسبة العنوسة ارتفعت في البلد.