أ: ايه رأيكوا الاسبوع ده ندعوا حد الي الله و الاسبوع الجاي نشوف بعض ونحكي مغامراتنا مع الدعوة الى الله.
ب: بس لازم نتعلم العلم الاول قبل ما نبدأ ندعو
أ: الصحابة كانوا بيدعوا اقوامهم الي الله وهما مش معاهم غير لا اله الا الله, واحنا لو سردنا العلم الى عندنا هيطلع على الأقل كتاب
ب: طيب ناخد دورة عن فن الدعوة الي الله الأول
أ: ده مدخل من مداخـ.... طيب هقولك حاجة , في مرة بصيت من البلكونة لاقيت بنت وولد واقفين مع بعض وقفة مش كويسة فى شارعنا الضلمة ده , فخطرت في بالي فكرة بسرعة.... نَزّلت السَبَت وندهت على البنت بس الولد هو الي جه, فقام بص في السبت واخد الي فيه, لاقاه شريط للأستاذ عمر خالد عن التوبة, فسحبت السَبَت بسرعة عشان ما يرجّعش الشريط تانى, قام بص فوق وكأنه بيقول شكراً وأخد الشريط ومشي على طول من الشارع.
عجبتني اوى الحكاية دى عشان أحيانا شارعنا بردوا بيحصل في كدة, وأنا ببقى مفروسة ومش عارفة أعمل حاجة, وقولت لازم يكون معايا شرايط من دي عشان ابقي جاهزة وقت اللزوم, فعلى طول بعد ما سبتهم رحت للمكتبة الاسلامية الى انا بحبها وقولت لصاحبها..
انا: عايزة شريط الشيخ محمود المصري أختاه وقفة مع النفس وشريط التوبة وشريط العفة للأستاذ عمرو خالد.
صاحب المكتبة: ده شريط الشيخ محمود المصري, انما مافيش عمرو خالد.
أنا: طيب في شرايط تانية للأستاذ عمرو خالد
صاحب المكتبة:لا.
أنا: طيب لو فوت عليك بكرة ألاقي شرايط الأستاذ عمرو خالد موجودة.
صاحب المكتبة(غاضباً): لا, احنا ما بقيناش بنشتغل في شرايط عمرو خالد, ولو روحتي أي مكتبة بردوا هتلاقيهم بطلوا بيشتغلوا فيها.
اتصدمت من الرد, وحاسبته علي الشريط الي اخدته وانا عايزة استفسر ليه بطلتوا تبيعوا شرايط الاستاذ عمرو خالد, بس خوفت انطق الاسم ادامه للمرة الرابعة لحسن مايحصليش كويس.
مشيت وانا قاعدة اتخانق معاه طول السكة - في خيالي طبعا- وجيت اطلعه عليكوا.
الخناقة الخيالية
أنا: ليه بطلتوا تبيعوا شرايط الاستاذ عمرو خالد؟!
صاحب المكتبة: عشانه متساهل, وأحنا بطلنا نبيع شرايطه عشان قد ابدلنا الله بعمرو خالد من هو خير منه, عايزة تسمعي ,اسمعي للشيخ محمد حسين يعقوب, الشيخ ابي اسحاق الحويني, الشيخ محمد حسان.
أنا: زمان حضرتك كنت بتسمع الاستاذ عمرو خالد, ولما ساعدك على الارتقاء ايمانيا بدأت تسمع الشيوخ الى بيخدموا درجتك الايمانية الحالية, لكن ما ينفعش ان لما تلاقيتهم بيقولوا كلام أعمق من الكلام الى بيقولوه الاستاذ عمرو خالد؛ تقول عليه متساهل, أنا فاكرة إن حضرتك كنت بتشغل شرايطه فى المكتبة وكنت بتبيعها, ولو كان بيقول حاجة غلط ماكنتش سمعته ولا بعت شرايطه, فهل هو أصبح متساهل فجأه؟ الاستاذ عمرو خالد مش متساهل ولا حاجة انما هو بيخاطب الناس الى في بداية التزامها و الناس الى مش ملتزمة أصلاً.
خلاص الخناقة خلصت
انا كنت زي كتير من الشباب شايفة ان الدين ده حاجة بتمنعهم من الاستمتاع بحياتهم وبتخنقهم ,عمري ما قعدت ادام الشعراوي والخمس دقايق بتوع برنامج حديث الروح كانوا بيعدوا كأنهم خمس شهور, كنت بزوغ من الكُتّاب وكنت بتعجب ازاي ماما لابسة حجاب أنا عمري ما هعمل كدة, وكنت مش بحب اى حد متدين وما كنتش بفخر اني مسلمة, كنت بسمع في الميكروباص حد بيزعق وبيقول انت ما بتصليش ليه؟ كنت بستغرب ازاي الناس تشتري شريط زي ده! وعمري ما سمعت درس ديني, عشان مافيش حاجة شدتني, مافيش شيخ كان بيخاطبني.
هناك ٧ تعليقات:
hey
الوفاء قيمة إسلامية عظيمة ، بارك الله فيك و نفع بك ، و جزى الله كل من دعا لله عن الإسلام خيرا
السلام عليكم ورحمه الله وبركاته
الاستاذ عمرو خالد له فضل كبير علينا كلنا وانا بشكره لاني اتعلمت منه كثيرا
الله ينصر الاسلام ويجعلنا دعاة صالحين بارك الله في شيخنا عرو خالد
والله ياأختى انا لسة من قريب بقول هذا الكلام لوحدة ووالله دائما بقول هذا الكلام اننا فى الاخر بننسى فضل اخونا الكبير الاستاذ عمرو خالد انه كان هو بفضل الله اللى كان بياخد ايدنا لطريق الهداية فوالله كان هوسبب فى حبى وعشقى للنبى من خلال برنامجه على خطى الحبيب فانا بقول ان فى ناس كتير محتاجة لهذه الطريقة اللينة السهلة حتى تتقرب الى الله فمثلا هو لما احنا كنا فى المدرسة واحنا صغار والابلة كانت بتعلمنا نقرا ونكتب وتعلمنا بالراحة فهل لما كبرنا واصبحنا عندنا القدرة على التعلم الاصعب اصبحنا ننكر فضل الابلة التى اخذت بايدنا وعلمتنا فاأرجو ان نتقى الله
شوفى هبه لا انكر ان عمرو خالد كلامه كان بيدخل القلب من غيير استاذان على فكرة انا تلميذه الشعرواى الحمدلله كنت ملتزمه من قبل عمرو خالد استااذ عمرو خالد ممتاز فى سرد القصص لكنه ليس جدير بالفتوى الاستاذ عمرو خالد فتن بالشهره وتسارع الناس حوله يمكن البدايات كانت مخلصه فتجمع الناس حوله ولكن هذا كان ضده اصبحت اشعر فى حديثه بالغرور والفخر حضرت له درس كان جاء النادى عندنا وبعد انتهاء الدرس طلب ان نذهب ونشترى شرايطه الموجودة معاه فى السياره وقتها صورته اتهزت فى نظرى
نحن المفروض اللى نسعى لشراء شرايطه وليس هو من يقوم بالترويج لها
ربنا يصلح لنا البدايات والنهايات
اللهم امين
جزاكم الله جميعاً كل الخير على التعليق
وجزاكي اختي الحبيبة (رفقة عمر) على تعليقك وطبعا رأيك يحترم لكن انا مش معاكي فيه لان احنا مش ممكن ندخل داخل قلوب الناس ونعرف هى مفتونة ولا مخلصة احنا ليس لنا الا الظاهر وكونة يروج لشرايطه فدي مش حاجة غلط ولا عيب لانه لا يروج لممنوعات بل هو يريد ان ينشر فكرته الاصلاحية الاسلامية التي توصل اليها
أما موضوع الفتوي فأنا دائما أسمعه يقول انا لا افتي , وهو فعلا لايفتي الا في اضيق الحدود ويقدمها في هيئة نصيحة.
والله يا جماعة أنا لا أحب الجدال ولكني احزن عندما ننتقد من يعلمون الناس الخير فلا يوجد انسان بلا عثرات, و أمرنا ان نغض ابصارنا عن هذه الاشياء الصغيرة ما دامت لا تضر المجتمع.
إرسال تعليق