للأم حسابات أخرى

19/3/2007
قـلبي يقولي اجيب هدية
عقـلي يقول:منييييين
قـلبي:طب أي حاجة بسيطة
عقـلي:لالالالا ده بيقولوا بدعة

يبقي لازم امهد لماما اني مش هجيبلها هدية

20/3 /2007
هتجيبيلي ايه السنادي في عيد الأم يا ماما
هجيبلك عريس
في سري: يا ترا بتتكلم جد ولا لاء , يا خوفي تكوني بتهزري يا ماما علي العموم ان غد لناظره قريب

21/3/2007
كنت راجعة من الكلية متأخر ومحلات الورد منورة و بوكيهات الورد تجنن
قلبي:انا لازم اجيب هدية, أكيد ماما هتزعل لو ما جبتلهاش حاجة وانا مايرضينيش ازعلها
عـقـلي:بدعة
قلبي:بس في ناس بتقول عادي يعني مش حرام
عقـلي:اتقي الشبهات
قلبي:ماما صعبانة عليا
عقـلي: خلاص , انما يكون في معلومك المرة الجاية لاممكن كلمتي تنزل الأرض ابداً

المهم جبت بوكيه صغير ,وعجبها اوي وقعدت تقول دي زهرة كذا ودي كذا ,الله , ده في زهرة كذا الي انا بحبها

22/3/2007
ماما:يا سلام يا هبة اما انتي جبتيلي حتت هدية عيد أم امبارح
واخدتني في حضنها
وانا مستغربة دي معملتش كدة امبارح
آه يبقي أكيد بتمهد لموضوع العريس
دي حاجة بسيطة يا ماما ده بوكية صغير
ماما: لا مقصدش الورد
أمال ايه
ماما: أصل أنا صحيت لاقيت المطبخ متروق وجميل, قعدت أدعيلك

سيبكوا من موضوع المطبخ دلوقتي
أهم حاجة ان موضوع العريس طلع فشوش
بس أكيد هي كانت تقصد عيد الام الجاي
انا عندي أمل